ՀՀ առողջապահության նախարար Արմեն Մուրադյանն առանց փողկապի գնացել է «Սասնա ծռերի» կողմից գրաված ՊՊԾ գնդի տարածք, սակայն իրավապահ մարմինները նախարարին թույլ չեն տվել ներս մտնել: Այս մասին հայտնել է առողջապահության նախարարի մամուլի խոսնակ Անահիտ Հայթայանը:
«Նախարարը գնացել էր բանակցելու, տեղում իրավիճակին ծանոթանալու ու խոսելու, սակայն նրա մուտքը ՊՊԾ գունդ արգելվել է», - նշել է Հայթայանը, գրում է Aysor.am-ը:
Ոստիկանության հասարակայնության հետ կապերի ու լրատվության ծառայությունից տեղեկացրել են, որ Մուրադյանին թույլ չի տրվել մտնելու Ոստիկանության պարեկապահակային գնդի տարածք, որպեսզի պատանդների թիվը չավելանա ևս մեկով, գրում է Tert.am-ը:
ՊՊԾ գունդը գրաված «Սասնա ծռերը» անուղղակիորեն հաստատել են բժիշկներին պատանդ վերցնելու տեղեկատվությունը:
«Բժիշկներին բաց կթողնենք այն դեպքում, երբ նախարարն անձամբ կներկայանա և այդ տարածքում կկազմակերպի վիրահատություններ», - գրել է խմբավորումը ֆեյսբուքյան իր էջում:
Դրանից առաջ, «Հիմնադիր խորհրդարան» շարժման անդամ Ալեք Ենիգոմշյանը լրագրողներին հայտարարել է, որ ՊՊԾ գունդը գրաված «Սասնա ծռերի» կողմից բժիշկներին պատանդ վերցնելու տեղեկատվությունը սուտ է:
«Ներսում ներկա է գտնվում բժիշկ, ոստիկանությունը հայտարարում է, որ պատանդ են վերցվել, նման բան բացարձակապես չկա: Տղաները պահանջում են, որ ինչպես առաջին օրերին էր, այնպես էլ այժմ, լինի բժշկական բրիգադի հերթափոխ: Պարտադրանքի գործադրմամբ բժշկին ներսում պահելու խնդիր չկա: Նրանք պահանջում են, որ գա փոխարինող բրիգադը, և ներկա պահին այնտեղ գտնվող բժիշկը դուրս գա, բրիգադներն իրար փոխարինեն», - պարզաբանել է Ենիգոմշյանը: