Վիրավորվել են «Սասնա ծռերից» ևս երկուսը. Նրանց հիվանդանոց են տեղափոխել
Հուլիսի 29-ին Էրեբունու ՊՊԾ գնդի տարածքում տեղի ունեցած փոխհրաձգությունում վիրավորների թիվը հասել է երեքի:
Ավելի վաղ հայտնի էր դարձել «Սասնա ծռերից» Արայիկ Խանդոյանի վիրավորվելու մասին: Ինչպես ֆեյսբուքյան իր էջում գրել է ոստիկանության մամուլի խոսնակ Աշոտ Ահարոնյանը, դրանից հետո հրաձգությունը չի դադարել. «Սասնա ծռերից» ևս 2 հոգի հրազենային վիրավորում է ստացել: «Նրանց ցուցաբերվում է պատշաճ բուժօգնություն», - գրել է նա:
Վիրավորներն են Արթուր Մելքոնյանը և Արմեն Լամբարյանը:
Հուլիսի 27-ին ԱԱԾ-ն հաղորդագրություն էր տարածել, որում, մասնավորապես, նշել էր, որ կրակ է բացելու «Սասնա ծռերի» անդամների ուղղությամբ, եթե խմբի անդամները կրակեն, թեկուզ՝ անկանոն, կամ փորձեն դուրս գալ գնդի տարածքից՝ հանձնվելուց բացի այլ նպատակներով:
