Եվրոպական երկրները պետք է ինքնուրույն որոշեն իրենց տարածքում ամերիկյան Հակահրթիռային պաշտպանության համակարգի (ՀՀՊ) տարրեր տեղակայելու մասին հարցը: Այդ մասին է հայտարարել Եվրահանձնաժողովի նախագահ Ժոզե Մանուել Բարոզուն: «Մենք չպետք է թույլ տանք, որ ինչ-որ երրորդ կողմ իրավունք ունենա վետո դնել այն բանին, ինչ անում է ինքնիշխան պետությունը»: Եվրամիության ցանկացած ինքնիշխան պետություն իրավունք ունի միջոցներ ձեռնարկել այլ երկրների մասնակցությամբ իր անվտանգության ապահովման համար»,-նշել է Բարոզուն, խոսելով Ռուսաստանի դիրքորոշման մասին` Եվրոպայում ամերիկյան ՀՀՊ տարրերի տեղակայման հարցում:

Բացի այդ, Եվրահանձնաժողովի նախագահը հերթական անգամ ասել է, որ հիասթափված է ԵՍՍՄՊ-ում իր մասնակցությունը կասեցնելու, հնարավոր է նաեւ այդ պայմանագրից դուրս գալու մասին Ռուսաստանի որոշմամբ:

Պուտինը, հանդես գալով անցած հինգշաբթի Դաշնային Ժողովին հղած ուղերձով, առաջարկեց մորատորիում հայտարարել ԵՍՍՄՊ-ին Ռուսաստանի մասնակցությանը, մինչեւ որ ՆԱՏՕ-ի բոլոր երկրները չվավերացնեն պայմանագիրը եւ չսկսեն այն կատարել, հաղորդում է ՌԻԱ «Նովոստին»: