ԱՄՆ դեսպան Ռիչարդ Մ. Միլս Կրտսերը և ՀՀ մշակույթի նախարարի պաշտոնակատար Հասմիկ Պողոսյանը սեպտեմբերի 16-ին ստորագրել են հուշագիր, որով պետք է իրականացվի Մեղրիի Սուրբ Սարգիս միջնադարյան եկեղեցու պահպանությունը, ինչպես նաև յուրահատուկ և բացառիկ որմնանկարների վերականգնման աշխատանքները:

«Մեր կողմից տրամադրվող գումարները այն արժեքների պահպանման համար են, որոնք անգին ժառանգություն են ոչ միայն տվյալ երկրի, այլև՝ ամբողջ մարդկության համար: Պահպանության, վերականգնման աշխատանքների իրականացման համար ԱՄՆ պետքարտուղարությունը հատկացնում է $450.000»,- նշել է դեսպան Միլսը:

Մեղրիի Սուրբ Սարգիս եկեղեցին 17-րդ դարի ինքնատիպ կառույց է՝ Միջին Արևելքում ու Կովկասում որմնանկարների եզակիությամբ առանձնացող:

ՀՀ-ում ԱՄՆ դեսպանատնից հայտնում են, որ ֆինանսավորումն իրականացվում է ԱՄՆ դեսպանի մշակութային արժեքների պահպանության հիմնադրամի կողմից (AFCP):

Սա 2005թ.-ից սկսած 10-րդ և ամենամեծ դրամաշնորհային ծրագիրն է: