Ջորջ Մարտինն ու Apple ընկերությունը միասին աշխատում են «Սառույցի և կրակի երգը» ֆենթեզի վեպերի շարքի ինտերակտիվ վարկածի վրա:

«Խաղերի գահը. Ընդլայնված հրատարակություն» գրքի թողարկումը iBooks-ով նվիրված է վեպի առաջին հրատարակության 20-ամյակին: Ինքը գրողն այդ իրադարձությունը մեկնաբանել է որպես «զարմանալի նոր քայլ գրքերի աշխարհում», հայտնում է Birdinflight-ը The Guardian-ի վրա հղումով:

Առաջին գրքի ինտերակտիվ վարկածում տեքստին հավելվում է կերպարների և նրանց ուղևորությունների քարտեզը, իրադարձությունների ժամանակագրությունը, զինանշանները, տոհմածառերը, տերմինների բառարանը, մանրամասն ծանոթագրությունները, աուդիոձայնագրությունները` այն ամենը, ինչը թույլ կտա ընթերցողին ավելի հեշտ կողմնորոշվել սյուժեում: Հրատարակման մեջ ներառված է նաև հատված վերջին «Ձմռան քամիները» վեպից, որը մինչ այդ հասանելի էր միայն սեղմ տեսքով գրողի կայքում:

Շարքի երկրորդ` «Արքաների պատերազմը» վեպի ինտերակտիվ տարբերակը կթողարկվի հոկտեմբերի 27-ին, երրորդ` «Թրերի մրրիկը»` դեկտեմբերի 15-ին: Չորրորդ և հինգերորդ` «Անգղների խրախճանքը» և «Պար վիշապների հետ» գրքերի ինտերակտիվ տարբերակներն ակնկալվում են 2017 փետրվարին և մարտին համապատասխանաբար:

«Գահերի խաղի» 7-րդ եթերաշրջանը մեկնարկում է հեռուստատեսությունում 2017-ի ամռանը: Այն կրճատվել է և բաղկացած կլինի 7 սերիայից 10-ի փոխարեն:

«Գահերի խաղն» ամերիկացի գրող Ջորջ Մարտինի «Սառույցի և կրակի երգը» վիպաշարի հիման վրա նկարահանվող հեռուստասերիալ է: Նախագիծը ղեկավարում են Դեվին Բենիոֆն ու Դենիել Վայսը, նկարահանումներն ընթանում են Իսլանդիայում, Մալթայում, Մարոկոյում, Խորվաթիայում, Հյուսիսային Իռլանդիայում: Սերիալը ցուցադրվում է 2011-ից, 2016-ի դրությամբ նկարահանված է 6 եթերաշրջան: Նախագիծը բազմաթիվ հեռուստատեսային մրցանակների է արժանացել, միաժամանակ հաճախ քննադատվում է բաց կամ դաժան տեսարանների ցուցադրության համար: 6-րդ եթերշրջանի ցուցադրությունը մեկնարկել է 2016-ի ապրիլի 24-ին, իսկ ապրիլի 21-ին հայտարարվեց, որ լինելու է նաև 7-րդ եթերաշրջան, իսկ 8-րդը կլինի վերջինը: Երկու վերջին հատվածներն ավելի կարճ կլինեն` 7-ում կլինի 7 սերիա, 8-ում` ընդամենը 6: HBO ներկայացուցիչները հրաժարվել են մեկնաբանություններից: