ՀՀ վարչապետը դեռևս չի պատասխանել անօթևան ընտանիքներին բնակարաններ նվիրաբերելու հետևանքով առաջացած հարկային բեռից ազատվելու խնդրանքով նրան դիմած Գյումրիի «Շիրակ կենտրոն»-ին:
«Շիրակ կենտրոնը» սեպտեմբերի 19-ին նամակով դիմել է ՀՀ վարչապետ Կարեն Կարապետյանին:
Նախորդ մի քանի տարիների ընթացքում «Շիրակ կենտրոնի» գործունեության շնորհիվԳյումրու ժամանակավոր կացարաններում սոցիալապես ծայրահեղ ծանր պայմաններում բնակվող մոտ 60 ընտանիքի նվիրվել են բնակարաններ, իսկ վերջին մեկ տարվա ընթացքում՝ 16 բնակարան:
Վերջերս ՀՀ կառավարությանն առընթեր պետական եկամուտների կոմիտեի Գյումրու տարածքային հարկային տեսչությունից ստացված գրություններով «Շիրակ կենտրոնից» պահանջվում է գնված բնակարանների արժեքի 10 տոկոսի չափով եկամտահարկ՝ մոտ 5 մլն դրամի չափով:
«Օրենքով սահմանված ժամկետում պատասխան չեմ ստացել՝ ոչ գրավոր, ոչ բանավոր: Դեռևս սպասելու ենք պատասխանի, քանի որ հնարավորություն չունենք վճարումները կատարելու», - PanARMENIAN.Net-ին ասաց «Շիրակ կենտրոն» ՀԿ նախագահ Վահան Թումասյանը:
Նրա խոսքով, չնայած դրան, կենտրոնը շարունակելու է իր գործունելությունը. «Շատ մարդ մեր օգնության կարիքն ունի, վերջերս երկու բնկարան ենք նվիրել, տնակներում ապրող ընտանիքների համար արդեն վառելափայտ ենք գնել: Թող դատական կարգով բռնագրավեն գույքը, քրգործ հարուցեն, սակայն միևնույն է մեր բարերարների գումարները չենք ցանկանում հարկերին ուղղել, այլ միայն բուն օգնությանը»:
Կարդացեք նաև՝ Գյումրեցի ևս մեկ անօթևան ընտանիք բնակարան է նվեր ստացել