Նոյեմբերի սկզբին «Գազպրոմ Արմենիա» փակ բաժնետիրական ընկերությունը դիմել է Հանրային ծառայությունները կարգավորող հանձնաժողով` ՀՀ-ում սպառողներին վաճառվող բնական գազի սակագների վերանայման հայտով՝ գազը սպառողների համար կէժանանա 7.7 դրամով, բացի այդ՝ կստեղծվեն սպառողների նոր խմբեր, որոնց համար սակագինը նորովի կհաշվարկվի։
PAN-ը հարցում է ուղարկել ընկերություն՝ փորձելով պարզել որքան բաժանորդ և սպառող է ներառված նշված խմբերում:
«Գազպրոմ Արմենիայից» պատասխանել են, որ 2016թ. սեպտեմբերի դրությամբ ընկերությունն ունի 688.326 բաժանորդ, որից 598.917 հանդիսանում են սպառող: Դրանցից 598.331-ը ամսական մինչև 10 հազ. մ³ սպառում ունեցող սպառողներն են, 586-ը՝ ամսական 10 հազ. մ³ և ավելի սպառում ունեցող:
Ստացվում է, որ 598.331 սպառողի համար հունվարի 1-ից գազը 7.7 դրամով կէժանանա:
Բացի այդ նշվում է, որ 2016-ի հոկտեմբերի դրությամբ 488 ջերմոցային տնտեսություն հանդիսանում է «Գազպրոմ Արմենիա» ՓԲԸ-ի բաժանորդ, որոնք ունեն բնական գազի մատակարարման (Մատակարար-բաժանորդ (կազմակերպություն)) պայմանագիր:
Ինչ վերաբերում է վերամշակող տնտեսություններին, ապա հոկտեմբերի 1-ի դրությամբ «Գազպրոմ Արմենիա» ՓԲԸ-ի բաժանորդ է խմիչք, պահածո, կաթնամթերք վերամշակող 235 տնտեսություն:
Ընկերությունից նաև հայտնել են, որ ընտանեկան կամ սոցիալական նպաստի իրավունք ունեցող սպառողների վերաբերյալ տվյալները պետք է տրամադրի ՀՀ աշխատանքի և սոցիալական հարցերի նախարարությունը:
Կարդացեք նաև՝Նազարյան. «Գազպրոմն» իր վրա կվերցնի գազի սակագնի նվազեցման ռիսկերը