ԱՄՆ գլխավորած կոալիցիայի անցկացրած փորձաքննության արդյունքում, որն անցկացվել է Մոսուլի համալսարանում, պարզվել է, որ ահաբեկչական «Իսլամական պետության» գրոհայինները իպրիտ են արտադրել այդ շենքում: Այդ մասին հայտարարել է Պենտագոնի պաշտոնական ներկայացուցիչ Ջեֆ Դևիսը:
«Նրանք դրական նմուշներ են ստացել: Մոսուլի համալսարանը ԻՊ քիմիական զենքի ծրագրի կենտրոնական վայրն է եղել»,-հայտարարել է Դևիսը: Նա պարզաբանել է, որ նմուշները վկայում են ծծմբային իպրիտի առկայության մասին, սակայն, նշել է, որ ԻՊ գրոհայինները նաև քլոր են կիրառել, հայտնում է ՌԻԱ Նովոստին:
Ավելի վաղ AP գործակալությունը բրիգադի գեներալ Հայդեր Ֆադիլի վրա հղումով հայտնել էր, որ Իրաքի զինվորականները ԻՊ գրոհայիններից ազատագրված Մուսոլի շրջաններից մեկում հայտնաբերել են թունավոր նյութի` իպրիտի պաշարներ:
ԻՊ-ն Իրաքում բազմիցս է իպրիտով և քլորով զինամթերք կիրառել խաղաղ բնակչության դեմ: