Ռուսաստանին զրկել են 2021թ. բիաթլոնի աշխարհի գավաթի խաղարկությունն անցկացնելու իրավունքից: Այդ մասին հայտնել է գերմանական ZDF պարբերականի լրագրող Նիլս Կաբենը, հայտնում է Republic.ru-ն:
Առաջնությունն անցնելու էր Տյումենում:
Այդ որոշումն ընդունվել է Բիաթլոնիստների միջազգային միության (IBU) արտահերթ նիստում:
Միևնույն ժամանակ Ռուսաստանի բիաթլոնիստների միության նախագահ Ալեքսանդր Կրավցովը հայտարարել է, որ հարցը դեռ քննարկվում է: «Զառանցանք: Ոչ ոք դեռ ոչնչից չի զրկվել»,-մեջբերել է Կրավցովի խոսքը «Ռ-Սպորտը»:
Բիաթլոնիստների միջազգային միության հաղորդակցությունների գծով տնօրեն Պեր Լանգեն նույնպես հաստատել է, որ Տյումենում աշխարհի առաջնության հարցը դեռ չի քննարկվել:
Ռուսական սպորտում խթանիչների լայն կիրառման մասին WADA-ի հանձնաժողովի զեկույցից հետո Չելյաբինսկը զրկվեց չմշկավազքի 2016/17թթ. Աշխարհի գավաթի եզրափակիչն անցկացնելու իրավունքից, իսկ Սոչին` 2017թ. բոբսլեյի և սքելեթոնի առաջնությունն անցկացնելու իրավունքից:
