Մայր Աթոռ Սբ Էջմիածնում նախատեսված է հատուկ ժողով անցկացնել՝ Պոլսո հայոց պատրիարքի փոխանորդ Արամ Աթեշյանի, եպիսկոպոս Սահակ Մաշալյանի մասնակցությամբ և Ամենայն Հայոց կաթողիկոս Գարեգին Բ-ի գլխավորությամբ:
Մայր աթոռից տեղեկացրել են, որ Աթեշյանը ժամանել է Հայաստան, գրում է Yerkir.am-ը:
Հանդիպման նպատակը Պոլսո հայոց պատրիարքի ընտրությունների կազմակերպման վերաբերյալ անհամաձայնությունների և խնդիրների հարթումն ու համատեղ լուծում գտնելն է:
Փետրվարի 22-ին Թուրքիայի հայ համայնքի մի խումբ ներկայացուցիչներ բաց նամակով դիմել էին Ամենայն Հայոց կաթողիկոս Գարեգին Բ-ին՝ պահանջելով հորդորել Արամ Աթեշյանին` հրաժարական տալ:
Պոլսո Հայոց Պատրիարքարանի եկեղեցական խորհրդի նախագահ տեր Սահակ եպիսկոպոս Մաշալյանը պաշտոնապես հրաժարական է տվել, ինչպես նաև հայտնել պատրիարքի ընտրություններում իր թեկնածությունը չառաջադրելու և Ստամբուլը հիմնովին լքելու մասին: Մաշալյանն իր որոշման համար մեղադրել է պատրիարքի փոխանորդ Աթեշյանին և հայտարարել, որ վերջինս ամեն կերպ խոչընդոտում է նախընտրական գործընթացն ու խախտում եկեղեցական կարգը՝ փոխպատրիարքի աթոռին մնալով մանիպուլյացիայի և սպառնալիքների միջոցով: