Ազգային ժողովի նախագահ Գալուստ Սահակյանը խորհրդարանում հայտարարել է, որ Վերահսկիչ պալատի նախագահ Իշխան Զաքարյանի լիազորությունները դադարեցվել են։
«Քանի որ Վերահսկիչ պալատի նախագահ Իշխան Զաքարյանի հրաժարականի դիմումի 15-օրյա ժամկետը լրացել է, դադարեցվել են նրա լիազորությունները», - հայտնել է Սահակյանը:
ԱԺ նախագահը նաև հայտարարել է, որ ՀՀ նախագահ Սերժ Սարգսյանն առաջարկել է Վերահսկիչ պալատի նախագահ նշանակել Լևոն Յոլյանին։
Զաքարյանը Վերահսկիչ պալատի նախագահի պաշտոնից հրաժարվելու դիմում էր ներկայացրել փետրվարի սկզբին։ Այժմ նա «Ծառուկյան դաշինքի» շտաբի պետն է:
2013-ին Յոլյանը եղել է Վերահսկիչ պալատի փոխնախագահը, իսկ 2016-ի փետրվարին նախագահ Սերժ Սարգսյանի հրամանագրով ազատվել է այդ պաշտոնից և նշանակվել Էներգետիկայի և բնական պաշարների նախարար։ Յոլյանն այդ կառույցը ղեկավարել է մինչև 2016-ի սեպտեմբերի 20-ը։