Կիևում ընթացող ըմբշամարտի Ուկրաինայի ականավոր մարզիչներին ու ըմբիշներին նվիրված 21-րդ միջազգային մրցաշարի առաջին օրը ՀՀ-ն ներկայացնող մարզիկները 4 մեդալ են նվաճել՝ մեկ ոսկի, մեկ արծաթ և 2 բրոնզ:

ՀԱՕԿ-ի պաշտոնական կայքը տեղեկացնում է, որ մարտի 3-ին մրցագորգ է մտել Հայաստանի հինգ հունահռոմեական ըմբիշ:

Սարգիս Քոչարյանը 80 կգ քաշային կարգում հաղթել է բոլոր մրցակիցներին ու նվաճել հաղթողի կոչումը:

Այս քաշային կարգում Ռաֆիկ Մանուկյանն արժանացել է բրոնզե պարգևի: Արծաթը նվաճել է 98 կգ քաշային Արթուր Շահինյանը, իսկ Գևորգ Ղարիբյանը երրորդ մրցանակակիր է դարձել 59 կգ քաշային կարգում:

Մարտի 4-ին մրցագորգը կտրամադրվի Կարեն Ասլանյանին՝ 66 կգ քաշային կարգ, Վարշամ Բորանյանին՝ 75 կգ, Մաքսիմ Մանուկյանին՝ 85 կգ և Վաչիկ Եղիազարյանին՝ 130 կգ:

Ավելի վաղ հաղորդվել է, որ Հայաստանը ներկայացնող առաջատար ըմբիշները մասնակցում են Կիևում մեկնարկող միջազգային մրցաշարին, որին հայտավորվել է 21 երկրի 337 մարզիկ: