Շվեդիայի ոստիկանությունը երկու մարդու է ձերբակալել ապրիլի 7-ին Ստոկհոլմի կենտրոնական փողոցներից մեկում բեռնատարի՝ մարդկանց մեջ մխրճվելու գործով:
Նրանցից մեկը ձերբակալվել է նույն օրը երեկոյան, երբ ոստիկանությունը հրապարակել էր տեսախցիկներից կադրեր նրա պատկերով: Ոստիկանությունը հայտնել էր, որ տղամարդը կասկածվում է ահաբեկչական հարձակում իրականացնելու մեջ, հաղորդում է BBC-ն:
Երկրորդ տղամարդուն ձերբակալել են Ստոկհոլմից հյուսիս-արևելք ընկած հատվածից. նա կապ է ունեցել առաջին ձերբակալվածի հետ:
Շվեդիայի վարչապետը ապրիլի 7-ին տեղի ունեցածը որակել է ահաբեկչական ակտ: Հարձակման զոհ է դարձել չորս մարդ, ավելի քան 10 մարդ տուժել է:
Հաղորդվում է, որ բեռնատարը գողացված է եղել: Այն պատկանել է տեղի գարեջրատներից մեկին, որի ներկայացուցիչը հայտնել է, որ մեքենան կորել է, երբ վարորդն ապրանքը տեղափոխելիս է եղել ռեստորան:
