«Ծառուկյան» դաշինքը կոալիցիա չի կազմել, հետևաբար՝ ընդդիմություն է: Այս մասին ասել է դաշինքի առաջնորդ Գագիկ Ծառուկյանը՝ Ծիծեռնակաբերդում Ցեղասպանության զոհերի հիշատակը հարգելուց հետո լրագրողների հետ զրույցում:

Պատասխանելով հարցին, թե արդյոք ԱԺ-ում հայտարարելու են, որ ընդդիմություն են, Ծառուկյանն ասել է. «Եթե կոալիցիա չենք, ուրեմն ընդդիմություն ենք։ Հիմա տեսա՞ք, որ ընդդիմություն ենք։ Ընդդիմությունը միայն ցեխ շպրտելը չի, պետք է կարողանան գործ անեն, որ մարդկանց կյանքում փոփոխություն լինի։ Մարդկանց վիրավորելով երկիր չի կառուցվում»։

2012-ին Գագիկ Ծառուկյանի գլխավորած Բարգավաճ Հայաստան կուսակցությունը հայտարարում էր, որ ընդդիմություն չէ, այլ՝ այլընտրանք:

Նա նաև տեղեկացրել է, որ ԱԺ ընտրություններում «Ծառուկյան» դաշինքի հավաքած ձայները չեն կարող երաշխիք լինել խոստացված ներդրումների կատարման համար:

Խոսելով նախընտրական քարոզարշավի ընթացքում 15 միլիարդ դոլարի ներդրման խոստումի մասին, Ծառուկյանը նշել է, որ իրենք ընտրություններում ստացել են միայն 29-30 տոկոս ձայն, և ինքը չի կարող երաշխիքներ տալ այն մարդկանց, ովքեր խոստացել էին ներդրումներ կատարել. «Այս հարցում պետք է սպասել հաջորդ ընտրություններին», մեջբերում է Ա1+-ը։

ԱԺ ընտրություններում «Ծառուկյան դաշինքը» ստացել էր 428.892 քվե կամ 27.35%-ը:

Նա նաև նշել է, որ իրենք դեռ որոշում չեն կայացրել, թե ով է Ծառուկյան դաշինքից զբաղեցնելու ԱԺ փոխնախագահի պաշտոնը. «Ոչ մի բան էլ դեռ որոշված չէ, որովհետև գործը դեռ Սահմանադրական դատարանում է»։