Ռուսաստանի կառավարությունը Պետդումա է ներկայացրել տիեզերական տարածության հետազոտման և օգտագործման ոլորտում Հայաստանի հետ համաձայնագրի վավերացման մասին օրինագիծը:
«Վավերացնել ՌԴ և ՀՀ կառավարությունների միջև ստորագրված համաձայնագիրը խաղաղ նպատակներով տիեզերական տարածության հետազոտման և օգտագործման ոլորտում»,-ասվում է օրենքի նախագծում, հայտնում է ՌԻԱ Նովոստին:
Համաձայնագրով որոշվում են տիեզերքի ոլորտում համագործակցության զարգացման սկզբունքներն ու նորմերը մտավոր սեփականության իրավունքների պաշտպանության, տարբեր տեսակի տեղեկատվության փոխանակման և պաշտպանության կանոնակարգման հարցերը և այլն:
Համաձայնագիրը ստորագրվել է 2016 թվականի ապրիլի 7–ին Երևանում։ Համաձայնագրի նպատակն է երկու երկրների կողմից խաղաղ նպատակներով տիեզերական տարածության հետազոտումն ու օգտագործումը, տիեզերական տեխնիկայի և տեխնոլոգիաների զարգացումը, դրանց կիրառման ոլորտներում փոխշահավետ համագործակցության ամրապնդումը, այդ նպատակով պատշաճ կազմակերպչական-իրավական հիմքի ստեղծումը:
