Թուրքիան, լինելով մի պետություն, որը բացահայտ աջակցել ու աջակցում է Ադրբեջանի ահաբեկչական քաղաքականությանն, անելիք չունի արցախյան հիմնախնդրի կարգավորման հարցում: Այդ մասին հայտարարել է ԱԺ փոխնախագահ Էդուարդ Շարմազանովն՝ անդրադառնալով Թուրքիայի արտաքին գործերի նախարար Մևլութ Չավուշօղլուի հայտարարությանը հայկական ուժերն Արցախից դուրս բերելու վերաբերյալ:
«Արցախյան զինուժը եղել և մնալու է Արցախում միշտ մի պարզ պատճառով. այն պիտի պաշտպանի իր սուրբ ու ազատ հայրենիքի անդորրը», - նշել է նա, հայտնում է Aysor.am-ը։
Էդուարդ Շարմազանովը զավեշտալի է որակել այն, երբ օկուպանտը խոսում է խնդրի խաղաղ կարգավորումից: «Դուք անհեթեթ կոչեր անելու փոխարեն ազատեք Կիպրոսը ձեր օկուպացիոն ներկայությունից», - նշել է Շարմազանովը։
Ավելի վաղ Թուրքիայի ԱԳ նախարար Մևլութ Չավուշօղլուն հայտարարել էր, որ Թուրքիան և Ռուսաստանը վերականգնել են հարաբերություններն ու այժմ աշխատում են տարածաշրջանային խնդիրների կարգավորման ուղղությամբ: «Մենք հաղթահարել ենք մեր տարաձայնությունները Ռուսաստանի հետ: Այսօր մեր հարաբերությունները վերականգնվել են և մենք գործակցում ենք տարածաշրջանի մի շարք խնդիրների կարգավորման հարցում»,-ասել էր նա:
