Երուսաղեմի Տաճարի լեռան վրա հսկիչ սարքերի տեղադրման դեմ արաբների զանգվածային բողոքներից հետո Իսրայելի իշխանությունները հանում են անվտանգության ապահովման հետ կապված բոլոր նոր օբյեկտները:
Այդպես, ապամոնտաժվել են միայն վերջերս տեղադրված պաշտպանիչ ճաղերն ու ամրակները, որոնց վրա ամրացվում էին տեսախցիկները: Այդ մասին հայտնում է Deutsche Welle-ն AFP գործակալության վրա հղումով:
Ավելի վաղ հանվել էին Տաճարի լեռան մատույցներում տեղադրված մետաղաորսիչ սարքերը:
Միևնույն ժամանակ Իսրայելի վարչապետ Բինյամին Նեթանյահուն սպառնացել էր «Ալ Ջազիրա» ալիքին՝ հայտարարելով, թե կփակի Երուսաղեմի գրասենյակը Տաճարի լեռան շուրջ առճակատման լուսաբանման պատճառով: Ըստ Նեթանյահուի, Կատարում գործող հեռուստաալիքը բռնություն է սադրում՝ հաղորդագրություններ տարածելով այդ թեմայի շուրջ: Իր ֆեյսբուքյան էջում Իսրայելի կառավարության ղեկավարը գրել էր, որ եթե գործող օրենքները թույլ չեն տալիս փակել հեռուստաալիքը, ապա պետք է հոգ տանեն օրենսդրության փոփոխության մասին:
Ավելի վաղ ՄԱԿ գլխավոր քարտուղար Անտոնիու Գուտերեշը մտահոգություն էր հայտնել Երուսաղեմի Հին քաղաքում բռնության աճի կապակցությամբ:
Հուլիսի 16-ին Իսրայելի իշխանությունները մետաղաորսիչ սարքեր են տեղադրել Տաճարի լեռան ճանապարհին Երուսաղեմի Հին քաղաքում ոստիկանների վրա արաբների հարձակումից հետո:
Բոյկոտելով մետաղաորսիչների տեղադրումը՝ հազարավոր մահմեդականներ հրաժարվում էին անցնել այդ հսկողությունն ու աղոթում էին հենց Երուսաղեմի փողոցներում, որոնք պարբերաբար վերաճում էին ոստիկանության հետ բախումների: 4 պաղեստինցի մահացավ: Տաճարի լեռան շուրջ իրավիճակի սրման պատճառով մոտ 900 պաղեստինցի է տուժել: Պաղեստինի ինքնավարության ղեկավար Մահմուդ Աբբասը հայտարարեց, որ Պաղեստինը սառեցնում է բոլոր կապերն Իսրայելի հետ: