Իրանում զբոսաշրջության զարգացման ծրագրի շրջանակում երկիրը $370.000 է հատկացրել ՅՈւՆԵՍԿՕ-ի Համաշխարհային ժառանգության ցանկում ընդգրկված հայկական եկեղեցիները վերականգնելու համար:
Ինչպես հայտնում է «Իրանն այսօր»-ը, այդ մասին տեղեկացրել է Մշակութային ժառանգության, արհեստների ու զբոսաշրջության կազմակերպության փոխղեկավար Մոհամադ-Հասան Թալեբիանը:
«Անհրաժեշտ է պահպանել պատմական եկեղեցիների տեսքը, դրա համար էլ Մշակութային ժառանգության կազմակերպությունը փորձում է հասարակության ուշադրությունը դարձնել դրանց՝ կրոնական արարողություններ կազմակերպելով ու վերականգնման նախագծեր իրականացնելով»,- ասել է Թալեբիանը:
Պաշտոնյան այդ հայտարարությունն արել է հայկական Սբ Թադեի վանք այցելության ժամանակ:
Կազմակերպության պլաններում է նաև 450 հայկական ու 150 ասորական եկեղեցի գրանցել:
2008-ին Սբ Թադեի վանքը Սբ Ստեփանոսի վանքի ու Ձորձոր մատուռի հետ համատեղ ընդգրկվել էր ՅՈւՆԵՍԿՕ-ի Համաշխարհային ժառանգության ցանկում «Իրանի հայկական եկեղեցիները» անվամբ: ՅՈւՆԵՍԿՕ-ի ներկայացուցիչների խոսքով, այս կառույցներն ընդգծում են հայկական ավանդույթների հզորությունն ու ուժը:
