Օգոստոսի լույս 10-ի գիշերն անհայտ անձինք վնասել են բանանի ներկրմամբ զբաղվող գործարար Վահրամ Միրաքյանին պատկանող արտադրական սառնարանները՝ թթու լցնելով շենքից դուրս տեղակայված կոմպրեսորների վրա։ Այս մասին հայտնել է ինքը՝ Միրաքյանը, ֆեյսբուքյան իր էջում:
Նա գրել է, որ չգիտի, թե ով է վնասել սառնարանները։
«Բայց իրենց հաստատ դուր չի գալիս, որ մենք բանան ենք ներկրում», - նշել է նա։
Գործարարը հավելել է, որ սառնարանը վնասողները լավ գիտեին՝ ինչ են անում, քանի որ լցրել են թթուն ամենակարևոր տեղերում։
«Այս պահին կիսլատան շարունակում է քայքայել սառնարանը, դեռ չենք մաքրում, որ ոստիկանությունը գա, մատնահետքեր վերցնի կամ նման մի բան», - գրել է Միրաքյանը։
Միրաքյանը տեղեկացրել էր բանան ներմուծելու մտադրության մասին վարչապետ Կարեն Կարապետյանի՝ 2016 թվականին արված այն հայտարարությունից հետո, որ Հայաստան ամեն ոք կարող է ներմուծել ամեն ինչ՝ առանց ոչ ֆորմալ սահմանափակումների։ Բանանի ու մի շարք այլ էկզոտիկ մրգերի խոշորագույն ներմուծողը «Քեթրին գրուպ» ընկերությունն է:
