Հայաստանը և Ռուսաստանը որոշել են Կովկասում հավաքական անվտանգության հակաօդային պաշտպանության (ՀՕՊ) միասնական համակարգի շրջանակում գործող զորքի կազմը: Այս մասին հայտնում է «ՌԻԱ Նովոստին»՝ ՌԴ Օդատիեզերական ուժերի հրամանատարի առաջին տեղակալ, գեներալ-լեյտենանտ Պավել Կուրաչենկոյին հղումով:
«Որոշվել է զորքերի ցանկը, որը ՌԴ-ն ու ՀՀ-ն կհատկացնեն Կովկասում հավաքական անվտանգության հակաօդային պաշտպանության միասնական համակարգին», - ՀՕՊ համակարգող հանձնաժողովի նիստում ասել է Կուրաչենկոն:
Նա շեշտել է, որ արդեն մեկնարկել է փաստաթղթերի մշակումը, որոնց շնորհիվ կիրականացվի երկրների միջև միասնական հակաօդային պաշտպանության համակարգի ձևավորումը:
2015 թվականի դեկտեմբերին Մոսկվայում Հայաստանը և Ռուսաստանը ստորագրել են համապատասխան փաստաթուղթը, իսկ 2016 թվականին Պետդուման վավերացրել է այն:
Ավելի վաղ նաև հայտնի է դարձել, որ ՌԴ Դաշնության խորհուրդն ընդլայնված նիստում վավերացրել է միացյալ զորախմբի մասին ՀՀ հետ համաձայնագիրը:
