Երևանն ընդգրկվել է ռուսաստանցի ավիաճանապարհորդների նախընտրելի ուղղությունների եռյակում մերձավոր արտասահմանի երկների թվում 2017-ի հունվար-հունիսի տվյալներով: Այդ մասին հայտարարել են «Տուտու.ռու» զբոսաշրջային ծառայության փորձագետները:
Մերձավոր արտասահմանի երկրների թվում առաջատարը մոլդովական Քիշնևն է: Եռյակում, Երևանից բացի, ընդգրկվել է նաև Թբիլիսին, գրում է Lenta.ru-ն:
Հեռավոր արտասահմանյան ուղղություններից ամենապահանջվածներն են Իսրայելը և Թուրքիան, մասնավորապես Անթալիան և Ստամբուլը:
Ամենապահանջված եվրոպական քաղաքը 2017-ի հունվար-հունիսին Պրահան է եղել: Առաջատարների եռյակում են կիպրական Լառնական և Մյունխենը:
Նշվում է, որ ավիատոմսերի գներն ընթացիկ տարվա առաջին կիսամյակում 2016-ի նույն ժամանակահատվածի համեմատ նվազել են 20 տոկոսով:
Ավելի վաղ հայտնի դարձավ, որ Երևանն ընդգրկվել է ռուսաստանցիների հանգստի համար աշնանային ճամփորդությունների լավագույն 5-յակում: Ցանկը կազմել է Euromag ամսագիրը և ավիատոմսերի որոնման Aviasales.ru ծառայությունը: