Հայտնի TripAdvisօr ճանապարհորդական կայքը կազմել է Երևանի լավագույն 10 թանգարանի վարկանշային աղյուսակը՝ հիմնվելով այցելուների կարծիքների վրա:
Լավագույն տասնյակը գլխավորում է Մատենադարանը, որտեղ պահվում է ավելի քան 23.000 ձեռագիր, հմայիլ և պատառիկ:
Երկրորդ տեղում Հայոց ցեղասպանության թանգարանն է: Այն վերանորոգվել էր և համալրել իր ցուցադրությունը՝ Ցեղասպանության 100-րդ տարելիցին ընդառաջ:
Հաջորդը հայ ամենատաղանդավոր կինոռեժիսորներից Սերգեյ Փարաջանովի թանգարանն է: Այստեղ մեկտեղվել են աշխարհահռչակ ռեժիսորի անձնական իրերը, նկարները, ինչպես նաև բեմական հագուստներն ու արվեստի աշխատանքները, որոնք նա ստեղծել է բանտում:
Հանրապետության հրապարակում գտնվող Պատմության թանգարանը այցելուներին ամենից շատ գրավող թանգարանների շարքում չորրորդն է: Թանգարանն ունի նաև առցանց ցուցադրություն, որի միջոցով կարելի է ծանոթանալ տարբեր հավաքածուների:
Հինգերորդ տեղում հայտնված Երևանի կոնյակի գործարանի թանգարանում հայկական կոնյակագործության ավանդույթներին ծանոթանալուց և հնեցման արտադրամասում շրջելուց զատ, կարելի է համտեսել նաև նրբահամ կոնյակ:
Կասկադում տեղակայված Գաֆեսճյան արվեստի կենտրոնը, որն ունի նաև բացօթյա ցուցադրություն, ոչ միայն արտասահմանցիների, այլ նաև երևանիցիների ամենասիրելի վայրերից է: Ժամանակակից արվեստի ցուցանմուշներ ներկայացնող թանգարանը վեցերորդն է աղյուսակում:
Հաջորդը «Դալան» արվեստի ցուցասրահն է; Այստեղ մեկտեղվել են տասնյակ հայ ժամանակակից արվեստագետների գործերը:
Ազգային պատկերասրահը նույնպես ամենատպավորիչների շարքում է: Թանգարանի 56 ցուցասրահներում ներկայացված են հայ և օտար գեղանկարիչների հարյուրավոր գործեր: Այստեղ լինում են նաև ժամանակավոր ֆոտո ցուցադրություններ:
«Մեգերյան կարպետ» հայկական գորգերի թանգարանը Երևանի ամենակոլորիտային վայրերից է: Հայկական գորգագործության լավագույն գործերի ցուցադրությունից զատ, այստեղ գործում է գորգերի արտադրամաս և ռեստորան, որտեղ մատուցվում են հայկական ազգային խոհանոցի կերակրատեսակներ:
Երևանի քաղաքապետարանի շենքին կից գործող Երևանի պատմության թանգարանը եզրափակում է մայրաքաղաքի լավագույն թանգարանների շարքը: Էրեբունի-Երևանի հիմնադրումից մինչև վարդագույն քաղաք. եանգարանի ցուցադրությունը խտացնում է երևանի բոլոր պատմական շերտերը:
