Ադրբեջանում դժգոհ են, որ ՌԴ առաջատար ԶԼՄ-ները հրապարակել են Արցախի Հանրապետության պաշտոնական դիրքորոշումը Կատալոնիայի անկախացման վերաբերյալ, որտեղ Ստեփանակերտը կոչ է արել Մադրիդին և Բարսելոնային երկխոսության ճանապարհով լուծել Կատալոնիայի հարցը:
«Կարևոր ենք համարում, որ Բարսելոնայի և Մադրիդի միջև քաղաքական ճգնաժամի հանգուցալուծումը գտնվի բացառապես խաղաղ միջոցներով և երկխոսության ճանապարհով։ Այս կապակցությամբ անհրաժեշտ է հիշեցնել, որ հենց Ադրբեջանի հրաժարվելը՝ ճանաչել Արցախի ժողովրդի ինքնորոշման իրավունքը, և պաշտոնական Բաքվի կողմից քաղաքական հարցերի լուծման համար ուժային մեթոդների կիրառումը ադրբեջանա-ղարաբաղյան հակամարտությունը տեղափոխեցին ռազմական հարթություն»,-ասվում է Արցախի ԱԳՆ հայտարարության մեջ։
«Ռուսական ԶԼՄ-ների շնորհիվ, այդ թվում RT-ի, ՌԻԱ Նովոստի գործակալության, ՏԱՍՍ-ի և այլ լրատվամիջոցների, ԼՂՀ-ի ոչինչ չնշանակող հայտարարությունն անսպասելի կերպով գերկարևոր դարձավ»,-գրում է Rusarminfo-ն ադրբեջանական ԶԼՄ-ների վրա հղումով:
Ադրբեջանական լրատվամիջոցները նաև վարկած են առաջ քաշել, որի համաձայն ռուսական ԶԼՄ-ներն, իբր, տարածում են այդ հաղորդագրությունը Կրեմլի հրահանգով, որի նպատակն է պառակտել Եվրոպան:
Արցախի ԱԳՆ հայտարարության մեջ ասվում է, որ անհերքելի է Կատալոնիայի ժողովրդի՝ իր քաղաքական կարգավիճակը ժողովրդավարական կամարտահայտության միջոցով ինքնուրույն որոշելու իրավունքը:
