Հոկտեմբերի 27-ին Կատալոնիայի խորհրդարանը քվեարկել է Իսպանիայից անկախություն հռչակելու օգտին: Եվրոպական միությունը ևս մեկ անգամ վերահաստատեց ավելի վաղ իր արտահայտած դիրքորոշումը, որ որևէ կերպ չի պատրաստվում միջամտել Իսպանիայի և Կատալոնիայի միջև հակամարտությանը:
ԱԳՆ խոսնակ Տիգրան Բալայանը PanARMENIAN.Net-ի հարցին, թե ինչպիսին է ԱԳՆ դիրքորոշումը, պատասխանեց, որ ուշադրությամբ հետևում են դեպքերի զարգացմանը. մյուս հարցին՝ այն դրակա՞ն է, թե՝ բացասական, հետևեց միայն «ուշադրությամբ հետևում ենք դեպքերի զարգացմանը» հակիրճ պատասխանը:
Արցախի հանրապետությունը ողջունել է Կատալոնիայի անկախացման գործընթացը: Արցախի հանրապետության նախագահի մամուլի խոսնակ Դավիթ Բաբայանն ասել էր, որ Ստեփանակերտը ողջունում է քաղաքակիրթ ինքնորոշման յուրաքանչյուր գործընթաց: «Ազգերի ինքնորոշումը միջազգային իրավունքի կարևոր բաղադրիչներից մեկն է, և պետությունները պետք է հարգեն այս իրավունքը»,-ասել է նա:
