2018-ի Ձմեռային օլիմպիական խաղերի առաջին ջահակիրը գեղասահորդուհի Յու Ենն է դարձել Փհենչհանում:
«Հպարտ եմ, որ պատիվ ունեմ առաջինը կրել օլիմպիական ջահը: Իմ երազանքն է ներկայացնել իմ երկիրն Օլիմպիական խաղերում, ես ամեն ինչ կանեմ այդ նպատակին հասնելու համար», - ասել է Յու Ենը փոխանցավազքի մեկնարկից առաջ, հայտնում է ՏԱՍՍ-ը:
Յու Ենը չի կարող մասնակցել առաջիկա Օլիմպիադային տարիքային սահմանափակման պատճառով՝ նրա 15 տարին դեռ չի լրացել, սակայն ազգային առաջնությունում նա 2016-ին 11 տարեկանում դարձել է Կորեայի Հանրապետության մեծահասակների առաջնության հաղթողը:
Ձմեռային Օլիմպիական խաղերը կանցնեն հարավկորեական Փհենչհանում փետրվարի 9-25-ը: 100 օր շարունակ 7500 ջահակիր օլիմպիական կրակը կանցկացնեն Օլիմպիադան ընդունող երկրի գավառներով: