Նոյեմբերի 14-ին ԱԳ նախարարի տեղակալ Կարեն Նազարյանն ընդունել է աշխատանքային այցով Հայաստանում գտնվող Ֆինլանդիայի ԱԳՆ պետքարտուղար Սամուլի Վիրտանենին։ Ֆիննական կողմի խնդրանքով Կարեն Նազարյանը ներկայացրել է ԼՂ հիմնախնդրի կարգավորման և տարածաշրջանում տեղի ունեցող զարգացումների վերաբերյալ Հայաստանի մոտեցումները։
Հանդիպման ընթացքում կողմերը քննարկել են երկկողմ օրակարգի ընդլայնմանն առնչվող հարցեր՝ երկուստեք փաստելով, որ դիվանագիտական հարաբերությունների հաստատումից ի վեր հայ-ֆիննական քաղաքական ու տնտեսական երկխոսությունը շարունակական զարգացում է ապրում։
Քննարկումները կենտրոնացել են առևտրատնտեսական համագործակցության ընդլայնմանն առնչվող հարցերի վրա, մտքեր են փոխանակվել ոլորտային ուղղություններով փոխգործակցության խթանման վերաբերյալ։
Փոխնախարար Նազարյանն անդրադարձել է Ֆինլանդիայի՝ որպես դոնոր երկրի կողմից տարբեր ոլորտներում իրականացվող աջակցության ծրագրերին, որոնք նպաստում են Հայաստանում սոցիալ-տնտեսական բարեփոխումների շարունակականությանն, ու կարևորել Հայաստանի և Ֆինլանդիայի արդյունավետ շփումները միջազգային տարբեր կառույցների, ինչպես նաև Եվրամիության հետ համագործակցության շրջանակներում, հայտնում է ԱԳՆ մամուլի ծառայությունը։
Նույն օրը Սամուլի Վիրտանենին ընդունել է նաև ՀՀ նախագահի աշխատակազմի ղեկավար Արմեն Գևորգյանը։
