Մոսկվայի «Վնուկովոյում» մոտ 500 կգ հայկական ձկնկիթ է առգրավվել
ՌԴ անասնաբուժական և բուսասանիտարական վերահսկողության հարցերով «Ռոսսելխոզնադզոր» դաշնային ծառայությունը Մոսկվայի «Վնուկովո» օդանավակայանում առգրավել է Հայաստանից ներկրվող 492 կգ կարմիր իշխանի ձկնկիթը: Այս մասին Mosday կայքի փոխանցմամբ, նշվում է ծառայություն հայտարարության մեջ:
Նշվում է նաև, որ ձկնկիթի խմբաքանակն ունեցել է Եվրասիական տնտեսական միության անասնաբուժական հավաստագիր:
Ստուգումների ժամանակ պարզվել է, որ մակնշման պիտակին նշված արտադրանքի քանակը, դրա պահման ու տեղափոխման համար անհրաժեշտ ջերմաստիճանը չեն համապատասխանել անասնաբուժական հավաստագրում նշված տվյալներին:
Մակնշման պիտակի վրա բացակայել է նաև «Ձկան և ձկնամթերքի անվտանգության մասին» տեղեկությունը, որը պահանջվում է ԵԱՏՄ տեխնիկական կանոնակարգով։
