ՀՀ նոր վարչապետի անունը հայտնի կլինի մեկ ամսից: Այդ մասին հայտարարել է ՀՀ նորընտիր նախագահ, գործող վարչապետ Սերժ Սարգսյանը` ուսանողների հետ հանդիպման ժամանակ: Նա նշեց, որ դեռեւս պատրաստ չէ ասել, թե ով է լինելու նոր վարչապետը, քանի որ վերջնական որոշում դեռ չի ընդունել: Միաժամանակ Սարգսյանն ընդգծեց, որ ինքն իր համար մատնանշել է մի քանի թեկնածուների, որոնց անունները դեռ պատրաստ չէ տալ: «ՀՀ նոր կառավարությունը ժողովրդի համար հասկանալի եւ ընդունելի կլինիե»- ընդգծեց վարչապետը: Նա ավելացրեց, որ կառավարության կառուցվածքում անսպասելի փոփոխություններ շատ են լինելու: «Չեմ ասում, թե բոլորը հեռացվելու են, բայց դա լինելու է նորընտիր նախագահի առաջին լուրջ քայլը, եւ ես ուզում եմ, որ այդ քայլը վստահություն ներշնչի, որ այն բոլոր խոստումները, որ ես տվել եմ նախընտրական շրջանում, անպայման իրականացվելու են»,- ընդգծեց Սարգսյանը:

Նա նաեւ տեղեկացրեց, որ պատրաստ է կառավարության ծրագրում ընդգրկել նախագահի մյուս թեկնածուների նախընտրական ծրագրերի որոշ կետեր, քանի որ կոալիցիոն կառավարություն նշանակում է ոչ թե պաշտոնների բաշխում, այլ ծրագրային դրույթների միավորում: