Մայիսի 8-ին Ազգային ժողովի հատուկ նիստում ՀՀ վարչապետ ընտրված Նիկոլ Փաշինյանը հայտարարել է, որ մասնակցելու է եվրասիական տնտեսական միության (ԵՏՄ) գագաթնաժողովին: Նա հավելել է, որ հուսով է, որ հանդիպում կունենա ՌԴ նախագահ Վլադիմիր Պուտինի հետ մայիսի 14-ին կայանալիք գագաթնաժողովում:

ԱԺ ԵԼՔ խմբակցության ղեկավար, հակակառավարական շարժման փաստացի առաջնորդ և ՀՀ վարչապետի միակ թեկնածու Նիկոլ Փաշինյանն ընտրվել է Հայաստանի վարչապետ:Ազգային ժողովի մայիսի 8-ի հատուկ նիստում նրա օգտին է քվեարկել 59 պատգամավոր, դեմ՝ 42:

«Հուսով եմ, որ երկկողմ հանդիպում տեղի կունենա, իսկ ԵՏՄ գագաթնաժողովին անպայման եմ մասնակցելու»,-ասել է նա, հայտնում է Sputnik Արմենիան:

Ավելի վաղ Կրեմլում հայտարարել էին, որ ակնկալում են, որ Հայաստանը կմասնակցի ԵՏՄ մայիսյան գագաթնաժողովին՝ հուսալով, որ միջոցառման շրջանակներում կկայանա նաև ՌԴ և ՀՀ ղեկավարների երկկողմ հանդիպումը: