Ամերիկահայ գործարար և բարերար, Reddit պորտալի համահիմնադիր Ալեքսիս Օհանյանի կինը՝ հայտնի թենիսիստուհի Սերենա Ուիլյամսն իրեն պատվավոր հայուհի է անվանել և խոստացել է Հայաստան այցելել: Այդ մասին հայտնում է Ubitennis սպորտային ռեսուրսը Twitter-ի իր միկրոբլոգում:

«Ամուսինս հայ է, վերջերս շատ բան եմ իմանում հայերի մասին, ես պատվավոր հայուհի եմ: Ինձ դուր է գալիս, որ նրանք այդքան հպարտ են: Ես մտադիր եմ այցելել Հայաստան, չգիտեմ այս տարի թե հաջորդ, դա ուրախ է լինելու»,-նշել է թենիսիստուհին:

36-ամյա Ուիլյամսն ու 34-ամյա Օհանյանը 2017-ի սեպտեմբերի 1-ին դուստր ունեցան, որին անվանեցին Ալեքսիս Օլիմպիա: Ուիլյամսը ռեկորդակիր է «Մեծ սաղավարտի» մրցաշարերի միանձնյա մրցույթներում հաղթանակների քանակով, նա 23 տիտղոս ունի: Բացի այդ նա 4 անգամ ոսկի է շահել Օլիմպիական խաղերում: