Թուրքիայում ՌԴ դեսպան Անդրեյ Կարլովի սպանության հետաքննության շրջանակում նախկին ոստիկան է ձերբակալվել: Ձերբակալվածի անունն ու պաշտոնը չեն հրապարակվել:
Կասկածյալին ձերբակալել են Անկարայում, հարցաքննության ժամանակ նա հերքել է իր հասցեին հնչած մեղադրանքները, գրում է «Վեդոմոստին» թուրքական «Անադոլու» գործակալության վրա հղումով:
Իրավապահ մարմինների նախկին աշխատակիցը մեղավոր է ճանաչվել ահաբեկչական կազմակերպության գործունեությանը մասնակից լինելու մեջ:
Անդրեյ Կարլովի վրա հարձակումը տեղի է ունեցել 2016-ի դեկտեմբերի 19-ին, երբ նա ելույթ էր ունենում ցուցահանդեսի բացմանը: Դեսպանը մահացավ ստացած հրազենային վերքերից: Դիվանագետի վրա կրակած 22-ամյա Մերթ Ալթինթաշը սպանվեց ոստիկանական գործողության ժամանակ: Ըստ քննության, հարձակվողը կապ ուներ Գյուլենի հետ և անձամբ էր նրան ճանաչում:
Սպանության հետաքննության շրջանակում ավելի վաղ ձերբակալվել էր 7 մարդ, այդ թվում թուրք մեդիամագնատ, Guru խմբի գլխավոր տնօրեն Հայրեդդին Այդինբաշը, ինչպես նաև ցուցահանդեսի կազմակերպիչը, որտեղ սպանվել էր դեսպանը: