Ռուսաստանից Երևան ավիատոմսերն օգոստոս-սեպտեմբերի համար թանկացել են 4%-ով 2017-ի նույն ժամանակահատվածի համեմատ: Այդ մասին հայտնել է Aviasales զբոսաշրջային ծառայության PR տնօրեն Յանիս Ձենիսը:
ՌԴ-ից Երևան ավիաթռիչքի միջին գինը կազմում է 12,3 00 ռուբլի (մոտ 120,000 դրամ), գրում է «Ինտերֆաքսը»:
Ձենիսը նշել է, որ միջին արժեքի բարձրացումը պայմանավորված է դոլարի փոխարժեքի աճով, պահանջարկի աճով, ինչպես նաև այն հանգամանքով, որ զբոսաշրջիկներից շատերն ավիատոմսերը գնում են վերջին պահին:
«Մասնակիորեն ազդել են նաև ավիակերոսինի գները: «Աերոֆլոտը» հայտարարել է, որ հուլիսի 26-ին բարձրացնում է 200 ռուբլով վառելիքային բաղադրիչը, նման հայտարարություն է արել նաև S7-ը»,-ասել է նա:
Ըստ Ռոսավիացիայի, ավիակերոսինն օդանավակայաններում միջինը թանկացել է 2,7%-ով: Աճը կապված է նավթամթերքի մեծածախ գների գարնանային աճի հետ: