Սեպտեմբերի 8-ին Կրեմլում մեկնարկել է ՀՀ վարչապետ Նիկոլ Փաշինյանի և Ռուսաստանի Դաշնության նախագահ Վլադիմիր Պուտինի հանդիպումը։ Ռուսաստանյան «ՏԱՍՍ» գործակալության փոխանցմամբ, Պուտինը նշել է, որ ՀՀ-ՌԴ հարաբերություններն աստիճանաբար զարգանում են բոլոր ուղղություններով։
Հանդիպման սկզբում երկու երկրի ղեկավարն ընդգծել են, որ հայ-ռուսական բարեկամությունը դարերի պատմություն ունի։
«ՀՀ-ՌԴ հարաբերությունները ներկայում զարգանում են բոլոր ուղղություններով, այդ զարգացումը վերաբերում է քաղաքական հարաբերություններին, ռազմատեխնիկական և անվտանգության ոլորտներին, ինչպես նաև տնտեսությանը»,- ասել է Պուտինը։
ՀՀ վարչապետ Նիկոլ Փաշինյանը նույնպես շեշտել է, որ հայ-ռուսական հարաբերություններն ունեն առանձնահատուկ բնույթ։
«Ի հեճուկս որոշակի վատատեսության, որն առկա է թե հայաստանյան, և թե ռուսաստանյան մամուլում և սոցիալական ցանցերում, ես կարծում եմ, որ մեր հարբերությունները զարգանում են դինամիկ կերպով», - ասել է Փաշինյանը՝ հավելելով, որ հայ-ռուսական հարաբերությունները զարգացման հսկայական ներուժ ունեն։
ՀՀ վարչապետը համոզմունք է հայտնել, որ ՀՀ-ՌԴ հարաբերություններում չկան անլուծելի հարցեր։
Սեպտեմբերի 8-ին մեկնարկել է ՀՀ վարչապետի աշխատանքային այցը ՌԴ։