Սերգեյ Դարբինյանը, ով 2008 թվականի ՀՀ նախագահական ընտրություններին հաջորդած իրադարձությունների ժամանակ Գորիսի զորամասի նորակոչիկ էր, պատմել է, որ այդ տարվա փետրվարի 29-ին զորամասում տագնապ են հայտարարել և ասել, որ Մարտակերտում դիվերսիա է եղել, պետք է գնալ այնտեղ, սակայն Ղարաբաղի փոխարեն, զինվորներին Երևան են բերել, հայտնում է «Ազատություն» ռադիոկայանը:
«Հետո ասացին՝ Երևան եք գնում: Միտինգների ժամանակ ինչ-որ հատուկջոկատային է մահացել, գնալուն ենք, որ պետական օբյեկտները պահպանենք», - ասել է նա՝ հավելելով, որ իր հետ Գորիսից Երևան է տեղափոխվել ևս 200-250 զինծառայող:
Նախկին զինվորի խոսքով՝ մարտի 1-ի լուսաբացից մինչև մարտի 8-ը իրենք հսկել են Օպերայի շենքի տարածքը։
Ավելի վաղ, Ս Հատուկ քննչական ծառայության պետ Սասուն Խաչատրյանը հայտարարել է, որ Մարտի 1-ին իրադարձությունների ընթացքում զինվորները տևական ժամանակ սահմանում մարտական հերթապահություն են իրականացրել առանց հերթափոխի, քանի որ նրանց մի մասը բերվել էր Երևան:
ՀՀ պաշտպանության նախարար Դավիթ Տոնյանն էլ հայտարարել էր, որ բանակի ներգրավվածությունը Մարտի1-ի իրադարձություններին փաստ է: Միևնույն ժամանակ, ՀՀ ԶՈւ ԳՇ պետ Արտակ Դավթյանը նշել էր, որ զինվորներին այդ իրադարձությունների ընթացքում կրակելու հրաման չի տրվել: