Ամբողջ աշխարհի օգտատերերը խնդիրներ են ունեցել խոշորագույն տեսահոսթինգ Youtube-ի, ինչպես նաև Youtube TV-ի և Youtube Music-ի հասանելիության հետ: Այդ մասին հայտնել է ծառայության թիմը:

«Մենք աշխատում ենք խնդիրը շտկելու վրա և անպայման կհայտնենք, հենց որ ուղղենք»,-ասվում է մշակողների հայտարարության մեջ: Թե հատկապես ինչ խնդրի մասին է խոսքը, չի հստակեցվում, գրում է «Վեդոմոստին»:

Ըստ Downdetector կայքի, խափանումը սկսվել է հոկտեմբերի 17-ին Երևանի ժամանակով մոտ 05:00-ին: Youtube-ի գլխավոր էջում տեսանյութ չի արտացոլվել ցանկացած սարքից: Մոտ 06:40-ին հաղորդագրություններ հայտնվեցին տեսածառայության աշխատանքի վերականգնման մասին:

Այսքան մեծ խափանումները տեսածառայությունում բավականին հազվադեպ են լինում: Վերջին անգամ մեծ խափանում էր եղել հունիսի կեսին, իսկ մինչ այդ 2018-ի ապրիլին: