Հոկտեմբերի 30-ին Իրանի արտաքին գործերի նախարար Մոհամմեդ Ջավադ Զարիֆը Ստամբուլում Թուրքիայի և Ադրբեջանի արտգործնախարարների հետ հանդիպմանը հայտարարել է, որ Լեռնային Ղարաբաղի հիմնախնդրի հետ կապված Իրանը կիսում է միևնույն մոտեցումը, ինչ Թուրքիան և Ադրբեջանը, հայտնում է թուրքական «Անադոլու» գործակալությունը:
«Կողմերի հետ (Հայաստանի և Ադրբեջանի ներկայացուցիչների-խմբ.) ամեն հանդիպման ժամանակ շեշտում ենք խնդրի՝ միջազգային իրավունքի հիման վրա և խաղաղ ճանապարհով կարգավորելու անհրաժեշտությունը», - ասել է Զարիֆը:
Ավելի վաղ «Ինտերֆաքս-Ադրբեջանը» գրել է, որ Ադրբեջանի, Իրանի և Թուրքիայի ԱԳՆ ղեկավարները Ստամբուլում հռչակագիր են ընդունել՝ նշելով ղարաբաղյան հակամարտության կարգավորման անհրաժեշտությունը «Ադրբեջանի տարածքային ամբողջականության շրջանակում»:
Հռչակագրի տեքստը տեղադրված չէ Իրանի և Թուրքիայի ԱԳՆ-երի պաշտոնական կայքերում, իրանական և թուրքական աղբյուրներում դրան անդրադարձ նույնպես չկա:
