Google-ի, Amazon-ի, Facebook-ի և այլ ընկերությունների ղեկավարները կմասնակցեն 2019-ի հոկտեմբերին Երևանում կայանալիք ՏՏ համաշխարհային կոնգրեսին: Այդ մասին ՀՀ փոխվարչապետ Մհեր Գրիգորյանը հայտարարել է Ղազախստանում ընթացող «Թվային օրակարգը գլոբալիզացիայի դարաշրջանում 2.0.Եվրասիայի ինովացիոն էկոհամակարգը» համաժովի ժամանակ:
Գրիգորյանը համաժողովի բոլոր մասնակիցներին հրավիրել է մասնկցել նաև հայաստանյան կոնգրեսին, որն անցկացվելու է հոկտեմբերի 6-9-ը, գրում է «Միր 24»-ը:
«Կարծում եմ, որ դա հետաքրքիր հարթակ կլինի մեր հերթական հանդիպման և քննարկումների համար,-պարզաբանել է ՀՀ փոխվարչապետը:
Ավելի վաղ հայտնի դարձավ, որ ՀՀ վարչապետ Նիկոլ Փաշինյանը ամերիկյան Apple ընկերության գլխավոր գործադիր տնօրեն Թիմ Քուքին հրավիրել է մասնակցելու 2019 թվականի հոկտեմբերին Հայաստանում անցկացվելիք Տեղեկատվական տեխնոլոգիաների համաշխարհային կոնգրեսին:
Վարչապետ Նիկոլ Փաշինյանը Թիմ Քուքին հանդիպել էր հունվարի 22-ին՝ Շվեյցարիայում, Դավոսի համաշխարհային տնտեսական ֆորումի շրջանակներում: Հանդիպմանը ներկա էր եղել նաև Արսեն Գասպարյանը, ով այդ մասին գրել էր իր ֆեյսբուքյան էջում: