Ճապոնիան մոտ $89,000-ի դրամաշնորհ է հատկացրել ՀՀ-ում կանանց և երեխաների առողջության պաշտպանությանը, հայտնել է ՀՀ առողջապահության մախարարության տեղեկատվության և հասարակայնության հետ կապերի վարչությունը:
Հայաստանում Ճապոնիայի դեսպան Ջուն Յամադան և Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտի տնօրեն Ռազմիկ Աբրահամյանը «Երևանում սեռավարակներով տառապող հղի կանանց համար բժշկական սարքավորումների տրամադրման նախագծի» դրամաշնորհի պայմանագիր են ստորագրել:
«Ուրախ եմ տեղեկացնել, որ «Մարդկային անվտանգության ապահովման» ծրագրի շրջանակներում Ճապոնիայի դրամաշնորհային օժանդակությունը $88,748-ի չափով այժմ կծառայի Հայաստանում կանանց և երեխաների առողջության պաշտպանությանը»,- ասել է Յամադան և հավելել, որ երեխաների առողջությունն է առողջ հասարակության բանալին, ինչը նշանակում է, որ պետք է օգտագործել բոլոր հնարավոր միջոցները` օգնելու նորածիններին լույս աշխարհ գալ առանց հիվանդությունների:
Առողջապահության նախարարի տեղակալ Արսեն Դավթյանը, կարևորելով մոր և մանկան առողջության պահպանումը, ընդգծել է, որ մայրական և նորածնային մահացության նվազեցման գործում բավականին հաջողություններ են արձանագրվել: