ՀՀ արտաքին գործերի նախարար Զոհրաբ Մնացականյանը Ռուանդայի խորհրդարանի Պատգամավորների պալատի նախագահ Դոնատիլ Մուկաբալիսայի հետ հանդիպման ժամանակ ասել է, որ Հայաստանը՝ որպես միջազգային հանրության պատասխանատու անդամ, շարունակելու է հետևողականորեն առաջ տանել ցեղասպանության կանխարգելման օրակարգը:
ՀՀ ԱԳՆ լրատվական ծառայության փոխանցմամբ, զրուցակիցները շեշտել են այդ հարցում միջազգային հարթակներում Հայաստանի և Ռուանդայի համատեղ ջանքերի ներդրման կարևորությունը:
Դոնատիլ Մուկաբալիսան ողջունել և բարձր է գնահատել Զոհրաբ Մնացականյանի մասնակցությունը Ռուանդայի ցեղասպանության 25-ամյակին նվիրված միջոցառումներին:
Ներկայացնելով Թավշյա հեղափոխության արդյունքում Հայաստանում տեղի ունեցած փոփոխությունները և դրան հաջորդած զարգացումները, Մնացականյանն ընդգծել է, որ կառավարության՝ ժողովրդի կողմից տրված լայն մանդատի հիման վրա իրագործվող բարեփոխումներն ուղղված են երկրում ժողովրդավարության ամրապնդմանը և տնտեսական ոլորտում հավասար հնարավորությունների ընձեռմանը, հաղորդում է ՀՀ ԱԳՆ լրատվության և հանրային դիվանագիտության վարչությունը:
Մնացականյանը Ռուանդայում է պաշտոնական այցով: