Բրիտանացի ճարտարապետ Նորման Ֆոսթերի ընկերությունը Փարիզի Աստվածամոր տաճարի վերականգնման նախագիծ է ներկայացրել, հայտնել է The Times-ը:
Դրանով առաջարկվում է տաճարի առաստաղն ու աշտարակը վերականգնել ապակյա կոնստրուկցիաներով:
Designboom կայքի փոխանցմամբ, NAB ընկերությունն էլ առաջարկել է տաճարի տանիքին ջերմոց և կրթական կենտրոն ստեղծել:
Ապրիլի 15-ի երեկոյան հրդեհ է բռնկվել Փարիզի Աստվածամոր տաճարում: Ֆրանսիացի հրշեջներին հաջողվել է փրկել տաճարն ու այնտեղ գտնվող մասունքները, սակայն կոթողը ծանր վնասներ է կրել։ Մասնավորապես, փլվել է շինության առաստաղն ու աշտարակը, այրվել է ներքին հարդարման զգալի մասը։
Փարիզի Աստվածամոր տաճարում բռնկված հրդեհը հետաքննվում է որպես դժբախտ պատահար: Այդ մասին հայտարարել է Փարիզի դատախազ Ռեմի Հեյցը: Հիմք չկա ենթադրելու, թե հրդեհի պատճառը միտումնավոր հրկիզումն է:
