ՌԴ-ն ներկայացնող հայազգի թենիսիստ Կարեն Խաչանովը դուրս է եկել թենիսի Ֆրանսիայի բաց առաջնության ՝ «Ռոլան Գարոսի» քառորդ եզրափակիչ: 1/8 եզրափակչում Խաչանովը հաղթել է արգենտինացի Խուան Մարտին Դել Պոտրոյին 7:5, 6:3, 3:6, 6:3 հաշվով:
Հաղթանակի շնորհիվ Կարեն Խաչանովը կընդգրկվի աշխարհի լավագույն թենիսիստների 10-յակում, հայտնում է championat.com-ը:
Խուան Մարտին Դել Պոտրոն աշխարհի 9-րդ ռակետն է:
«Սա այն է, հանուն ինչի ես աշխատում եմ՝ այս պահերով ապրելու համար: Երբ հաղթում ես այսպիսի խաղում, ուղղակի երջանիկ ես: Երջանիկ ես բոլոր գործադրված ջանքերի, կայացած հանդիպումների համար: Դու ուղղակի շնորհակալ ես թիմին և ընտանիքիդ»,-ասել է Խաչանովն իր հաղթանակի մասին:
«Ռոլան Գարոսի» քառորդ եզրափակչում Խաչանովը խաղալու է ավստրիացի Դոմինիկ Թիմի հետ:
Սա Խաչանովի առաջին մասնակցությունն էր «Մեծ սաղավարտի» մրցաշարին քառորդ եզրափակչում: