Ադրբեջանում առանց նախազգուշացման անցկացվող զորավարժությունների հարցը բարձրացված է ԵԱՀԿ-ում: Այդ մասին ՀՀ ԱԳ նախարար Զոհրաբ Մնացականյանը հայտարարել է ԱԺ-ում:
Նրա խոսքով՝ Ադրբեջանի վարքն ու պահվածքն Արցախի հարցում ընդհանրապես նախարարության մշտական գերակա դիտարկման տակ է, և իրենք համապատասխան հայտարարություններ են անում, խնդիրները ներկայացնում երկկողմ ու բազմակողմ ձևաչափերով հանդիպումների ժամանակ, հայտնում է Yerkir.am-ը։
Մնացականյանի խոսքով՝ ԵԱՀԿ-ում կան մասնագիտական կառույցներ, որոնց առաջ էլ բարձրացվում են սպառազինությունների, ինչպես նաև զորավարժությունների մասին հարցերը, քանի որ այդ ամենի վերաբերյալ կան կանոններ, որոնք Ադրբեջանը չի հարգում։
Ադրբեջանն ու Թուրքիան հունիսի 7-13-ը համատեղ զորավարժություններ կանցկացնեն Նախիջևանում: Մարտական կրակով համատեղ մարտավարական «Անխախտելի եղբայրություն-2019» զորավարժությունները կանցնեն ըստ երկրների միջև Ռազմական համագործակցության մասին համաձայնագրի:
ՊՆ մամուլի քարտուղար Արծրուն Հովհաննիսյանը հայտարարել է, որՀայկական կողմն ուշի ուշով հետևում է Նախիջևանում կայանալիք թուրք-ադրբեջանական զորավարժությունների նախապատրաստմանը:
