Ռոստովի շրջանից 18-ամյա ուսանող Հովսեփ Գևորգյանը փրկել է հրդեհից Կամենսկ Շախտինսկ քաղաքի հաշմանդամություն ունեցող բնակչուհուն:

«Օգոստոսի 1-ին 08:04-ին հրեդհ է տեղի ունեցել Կամենսկ Շախտինսկի մասնավոր տանը: Այրվել է տան տանիքը: Հովսեփ Գևորգյանը, լինելով մոտակայքում և տեսնելով բոցը, առանց վարանելու մտել է այրվող տուն»,-հայտնում է ՌԴ Ռոստովի մարզի ԱԻՆ Գլխավոր վարչության մամուլի ծառայությունը:

Հայտնվելով այրվող տանը՝ Հովսեփ Գևորգյանը տեսել է, որ այնտեղ հաշմանդամություն ունեցող կին կա, նա դուրս է բերել կնոջը ձեռքերի վրա: Օգնության եկած ընկերը դուրս է բերել հաշմանդամի սայլակը:

«Ես, իրոք, այդ պահին չէի մտածում վտանգի մասին, բայց եթե այդպիսի բան կրկնվի, նորից կնետվեմ կրակի մեջ առանց վարանելու: Կարծում եմ, իմ փոխարեն յուրաքանչյուրն այդպես կվարվեր»,-ասել է Գևորգյանը «Կոմսոմոլսկայա պրավդա-Ռոստով» պարբերականին:

Իսկ հարևաններն այդ պահին գոռում էին Գևորգյանին. «Մի մտիր, հիմար, կայրվես»:

Փողոցում հավաքված մարդիկ հրշեջ ծառայություն են կանչել: Հրշեջները մարել են կրակը և շնորհակալություն հայտնել երիտասարդին: