Ոստիկանների կողմից բռնություն գործադրելու տեսանյութի առթիվ Հատուկ քննչական ծառայությունում հարուցվել է քրեական գործ: Այս մասին PanARMENIAN.Net-ի հետ զրույցում ասաց ՀՔԾ մամուլի խոսնակ Մարինա Օհանջանյանը:
«Քրեական գործը հարուցվել է ՀՀ ՔՕ-ի 309-րդ հոդվածի 2-րդ մասով: Մեզ մոտ նյութեր էին նախապատրաստվում՝ դրա հիման վրա էլ քրգործ է հարուցել»,- ասաց Օհանջանյանը:
Անդրադառնալով դիտարկմանը, որ այս գործով կասեցվել էր Ճամբարակի ոստիկանության բաժնի պետի լիազորությունները, հնարավոր է որ նա որպես մեղադրյալ ներգրավվի, Օհանջանյանը նշեց, որ այս պահին այլ ինֆորմացի գործի առիթով փոխանցել չի կարող:
Նոյմեբրի 21-ին համացանցում էր հայտնվել«Ոստիկանները հակագազով ու մահակով ցուցմունք են կորզում» վերնագրով տեսանյութ: Ավելի ուշ տեսանյութի առիթով ոստիկանությունում ստուգումներ էին սկսվել: Նոյեմբերի 23-ին ոստիկանության բաժնում խոշտանգման տեսանյութի գործով Ճամբարակի բաժնի պետ Նարեկ Սիմոնյանի լիազորությունները ժամանակավորապես դադարեցվել էին:
