ԱՄՆ Կոնգրեսի իրավաբանական կոմիտեի ղեկավար Ջերալդ Նադլերը հայտարարել է, որ բավարար հիմքեր կան նախագահ Դոնալդ Թրամփի իմպիչմենտի համար:
Ըստ նրա, Թրամփը գերազանցել է լիազորությունները և խախտում արել: Կոմիտեում լսել են 4 փորձագետների, որոնց ցուցմունքները, ըստ Նադլերի, հաստատել են այդ փաստը, գրում է «Ռոսիյսկայա գազետան»:
«Նախագահը իմպիչմենտի հանգեցնող խախտում է արել: Նա խնդրել է օտարերկրյա կառավարությանը միջամտել մեր ընտրություններին: Հետո դա ի հայտ է եկել և նա խանգարել է քննիչներին: Երկու անգամ»,-հայտարարել է Նադլերը: Նա նաև ԱՄՆ նախագահի գործողությունները սպառնալիք է համարել ազգային անվտանգությանը և սպառնալիք առաջիկա ընտրություններին:
Նադլերը նշել է, որ Թրամփին արդարադատությանը խոչընդոտելու մեջ մեղադրելու համար վկայությունները «ավելի քան բավարար են»:
Մինչդեռ ինքը Թրամփը «կատակ» է անվանել իր իմպիչմենտի մասին զեկույցը:
Զեկույցում ասվում է, որ Թրամփն առաջին նախագահն է ԱՄՆ պատմության մեջ, որը փորձել է խանգարել իմպիչմենտի քննությանը՝ մերժելով Կոնգրեսի համապատասխան լիազորություններն ու նույնիսկ սպառնալով վկաներին: