Հայաստանում գործող դիվանագիտական ներկայացուցչությունների մեքենաները հաճախ են հայտնվում քաղաքացիների սմարթֆոնների տեսակցիկի օբյեկտիվում՝ սխալ կայանելու, ճանապարհային երթևեկության կանոնները կոպտորեն խախտելու պատճառով։
Համատարած կարծիք և դրանից բխող դժգահություններ կան, որ դիվանագիտական համարներով մեքենաները ՀՀ-ում երթևեկության կանոնները խախտելու դեպքում չեն տուգանվում կամ տուգանվում են սովորական քաղաքացիներից ավելի քիչ: Պարզվում է՝ այդ մեքենաների վարորդները, այնուամենայնիվ, տուգանվում են։
«Հայաստանում հավատարմագրված դիվանագիտական, հյուպատոսական ներկայացուցչություններին, միջազգային կազմակերպություններին պատկանող տրանսպորտային միջոցներով կատարված և տեսանկարահանման կամ լուսանկարահանման միջոցով հայտնաբերված իրավախախտումների փաստերով 2019-ին կայացվել է 732 վարչական տույժ նշանակելու մասին որոշում»,- PanARMENIAN.Net-ի հարցմանը պատասխանեցին ՀՀ ոստիկանությունից:
ՀՀ-ում հավատարմագրված բոլոր դիվանագիտական ներկայացուցչությունները միասին ունեն մի քանի հարյուր մեքենա, դրանց կոնկրետ թիվը, սակայն, գաղտնի տեղեկություն է:
Ստույգ տեղեկատվության բացակայության պատճառով, տուգանելու հաճախականության ու դիվանագիտական համարներով մեքենաների խախտումների արձանագրման հետևողականության մասին դատողություններ անելու բավարար հիմքերը քիչ են։