Հայաստանում կորոնավիրուսի կասկածանքով հոսպիտալացված 6 անձի լաբորատոր հետազոտությունների արդյունքում նոր տիպի վիրուսի առկայությունը ժխտվել է:
Նոր կորոնավիրուսի թեստերն արդեն մի քանի օր է՝ Հայաստանում են:
Հոսպիտալացվածներին նմուշառումներ էին արվել՝ լաբորատոր հետազոտությունների համար: Արդյունքում թե գրիպի, թե կորոնավիրուսի հետազոտությունները բացասական էին եղել, տեղեկացնում են Առողջապահության նախարարությունից:
Գերատեսչությունը հորդորում է խուճապի չմատնվել և հետևել բժիշկների խորհուրդներին՝ զերծ մնալով ոչ մասնագիտական ուղղորդումներից և մեկնաբանություններից:
ՌԴ «Ռոսպոտրեբնադզորը» 2019-nCoV-ի ախտորոշման թեստ համակարգեր է փոխանցել ԵԱՏՄ և ԱՊՀ երկրներին, այդ թվում՝ Հայաստանին: Թեստերը փոխանցվել են անհատույց:
Առողջապահության համաշխարհային կազմակերպությունը նոր կորոնավիրուսի բռնկումը Չինաստանում ճանաչել էր միջազգային նշանակության արտակարգ իրավիճակ: Դրանից հետո Հայաստանը 2 ամսով կասեցրել էր վիզաների ազատ ռեժիմը Չինաստանի հետ:
