Սյունիքի մարզում ձնահյուսի տակ մնացած 3 զինվորի մահվան փաստով քրգործ է հարուցվել, հայտնում են ՀՀ քննչական կոմիտեից։
Այն հարուցվել է Քրեական օրենսգրքի 376-րդ հոդվածի 2-րդ մասով (Ծառայության նկատմամբ պետի կամ պաշտոնատար անձի անփույթ վերաբերմունքը՝ եթե անզգուշությամբ առաջացրել են ծանր հետևանքներ), հոդվածը 3-6 տարի ազատազրկում է նախատեսում: Գործի քննությունը վարում է ՔԿ զինվորական քննչական գլխավոր վարչությունը։
Փետրվարի 7-ին, ժամը 17:00-ի սահմանում Սյունիքում ՊՆ զորամասի մարտական հենակետերի հերթապահության հերթափոխի ժամանակ պայմանագրային զինծառայողներ Կարապետ Սեդրակի Նազարյանը, Տիգրան Արմենի Արզումանյանը, Նվեր Տիգրանի Շահբազյանն ու Համլետ Գրենիկի Միրզոյանը մնացել էին ձնահյուսի տակ։
Ձեռնարկված որոնողական-փրկարարական աշխատանքների արդյունքում նրանցից 3-ին մահացած էին հայտնաբերել, շարքային Համլետ Գրենիկի Միրզոյանը մարմնական թեթև վնասվածքներ է ստացել։