Վարկային կազմակերպություններն ու բանկերը մինչև 200,000 դրամ և 3 ամիս տևողությամբ վարկեր տրամադրելիս պետք է հաշվի առնեն հաճախորդի եկամուտները։
ԱԺ «Իմ քայլը» խմբակցության պատգամավորներ Վարազդատ Կարապետյանը և Արտակ Մանուկյանը սպառողական վարկերին առնչվող օրենսդրական փոփոխությունների փաթեթ են մշակել՝ կաճաժամկետ վարկերի բացասական ազդեցության դեմ:
Կարապետյանը ֆեյսբուքյան իր էջում հայտնել է, որ Կենտրոնական բանկի հետ նախնական պայմանավորվածությամբ, հաճախորդի բոլոր վարկերի գծով մարման բեռը պետք է կազմի ընդհանուր եկամուտների 50%-ից ոչ ավելի ն։
Նշվում է, որ վարկային կազմակերպություններն ու բանկերը իրավունք չունեն արտաքին գովազդ իրականացնել։ Գովազդը միայն կարող է տեղադրվել հենց մասնաճյուղերի տարածքում` դրսից չդիտարկվող հատվածներում։ Հակառակ դեպքում սահմանված է վարչական տուգանք:
Կենտրոնական բանկը սահմանում է վարկեր տրամադրող մասնաճյուղին ներկայացվող պահանջները և վարկերի տրամադրումը պետք է իրականացվի միայն գրանցված մասնաճյուղերում:
Մարդկանց հնարավոր մանիպուլյացիաներից պաշտպանելու համար առաջակվում է, որ վարկային պայմանագրեր կնքելիս հաճախորդը ձեռագիր լրացնի այն գումարի չափը, որը պետք է վերադաձնի պայմանագրի ավարտին։
ՀՀ-ում վարկային կազմակերպություններն ու բանկերն առաջարկում են վարկերի տրամադրում նաև միայն անձնագրով կամ օնլայն: Վարկ ստանալու գործընթացի հեշտացման հետ զուգահեռ՝ երկրում որոշ քաղաքացիների համար դժվարանում է նաև վարկային պարտավորությունների կատարումը: