ԱԳՆ խոսնակ Աննա Նաղդալյանն, անդրադառնալով ՀՀ և Վրաստանի միջև մուտքի ընթացակարգերի դյուրացմանը և նույնականացման (ID) քարտով հարևան երկիր մուտք գործելու հնարավորությանը, հայտարարել է, որ մտադրությունների հուշագրի ստորագրմամբ հիմք է տրվում բանակցությունների մեկնարկին:
Վարչապետ Նիկոլ Փաշինյանի այցի շրջանակում պայմանավորվածություն է ձեռք բերվել Հայաստանի և Վրաստանի միջև մուտքի ռեժիմի ընթացակարգերի դյուրացման մասին. խոսքը նույնականացման քարտերով ճամփորդելու հնարավորության մասին է:
«Ինչպես տեղեկացրել ենք, Հայաստանի և Վրաստանի ԱԳ նախարարների կողմից ընդգծվել է մարդկանց միջև շփումների խրախուսման և հասարակությունների միջև կապերի ամրապնդման կարևորությունը և այդ առնչությամբ ստորագրվել է մտադրությունների հուշագիր:
Դրա ստորագրմամբ հիմք է տրվում համապատասխան երկկողմ միջազգային պայմանագրի կնքման շուրջ բանակցությունների մեկնարկին: Պայմանագրի կնքման և ուժի մեջ մտնելու գործընթացի տարբեր փուլերում, օրենսդրության համապատասխան, կապահովվի հանրության պատշաճ իրազեկումը»,- նշել են ԱԳՆ-ում։
